• ಪ್ರತಿ ಕೇಂದ್ರವೂ 01 ಸಂಖ್ಯೆಯ ಬ್ರಾಡ್ ಬ್ಯಾಂಡ್ ಸೈಸ್ಮೋಮೀಟರ್ (CMG-3T), ಸ್ಟ್ರಾಂಗ್ ಮೋಶನ್ ಆಕ್ಸಿಲೆರೊಗ್ರಾಫ್ (CMG-5T), ಡಿಜಿಟಲ್ ಮಾಹಿತಿ ಸ್ವಾಧೀನ ವ್ಯವಸ್ಥೆ (CMG-DM24-S6-EAM), ಜಿ ಪಿ ಯಸ್, ವಿ-ಸ್ಯಾಟ್ ಆಂಟೆನಾ, ಮೋಡೆಮ್ ಮತ್ತು ಅಗತ್ಯವಿರುವ ಬಿಡಿಭಾಗಗಳನ್ನು ಅನುಸ್ಥಾಪನೆ ಮಾಡಲಾಗಿದೆ.
• ಸ್ಥಾಪನೆ ಮಾಡಿರುವ ಉಪಕರಣಗಳಿಗೆ ನಿರಂತರ ವಿದ್ಯುತ್ ಸರಬರಾಜು ಮಾಡಲು, ಸೌರಶಕ್ತಿಯಿಂದ ವಿದ್ಯುತ್ (ಭೂಕಂಪನ ಉಪಕರಣಗಳಿಗೆ 12 ವೋಲ್ಟ್ ಮತ್ತು ವಿ ಸ್ಯಾಟ್ ಉಪಕರಣಗಳಿಗೆ 24 ವೋಲ್ಟ್) ಪೂರೈಕೆ ವ್ಯವಸ್ಥೆ ಕಲ್ಪಿಸಲಾಗಿದೆ. ಭೂಕಂಪನ ಉಪಕರಣಗಳು ದಾಖಲು ಮಾಡುವ ಭೂಮಿಯ ಕಂಪನ (ಸ್ಥಳೀಯ, ಪ್ರಾದೇಶಿಕ ಮತ್ತು ಟೆಲಿಸಿಸ್ಮಿಕ್)ಗಳನ್ನು ವಿ-ಸ್ಯಾಟ್ ಮತ್ತು ಸೌರಶಕ್ತಿಯ ಸಹಾಯದಿಂದ ಕೆ ಎಸ್ ಎನ್ ಎಂ ಡಿ ಸಿ, ಬೆಂಗಳೂರು ಕೇಂದ್ರ ಕಚೇರಿಗೆ ನಿಜ ಸಮಯದಲ್ಲಿ, ನಿರಂತರವಾಗಿ ಕಳುಹಿಸಲಾಗುತ್ತಿದೆ.
• ನಿಜ ಸಮಯದಲ್ಲಾಗುವ ಭೂಕಂಪನಗಳ ಮೂಲ ಮಾಹಿತಿಗಳನ್ನು (ಸಮಯ, ಪರಿಮಾಣ, ತೀವ್ರತೆ, ಅಧಿಕೇಂದ್ರ ಮತ್ತು ಸುನಾಮಿ ಅಲೆಗಳು) ಕೇಂದ್ರ ಕಚೇರಿಯಲ್ಲಿ ಪರೀಕ್ಷಿಸಿ 10 ರಿಂದ 15 ನಿಮಿಷಗಳಲ್ಲಿ ಸಂಬಂಧಪಟ್ಟ ಕಾರ್ಯದರ್ಶಿಗಳು, ಅಣೆಕಟ್ಟುಗಳ ಎಂಜಿನಿಯರುಗಳು ಮತ್ತು ಜಿಲ್ಲೆ-ತಾಲ್ಲೂಕ್-ಗ್ರಾಮಪಂಚಾಯತಿ ಮಟ್ಟದ ಅಧಿಕಾರಿಗಳಿಗೆ ಸಂಕ್ಷಿಪ್ತ ಎಸ್ ಎಂ ಎಸ್ ಕಳುಹಿಸಲಾಗುತ್ತದೆ. ಮುಂದುವರೆದು ವಿವರವಾದ ತಾಂತ್ರಿಕ ಮತ್ತು ಕೈಗೊಳ್ಳಬೇಕಾದ ಕ್ರಮಗಳ ವರದಿಯನ್ನು ಸಿದ್ದಪಡಿಸಿ ಸಂಬಂಧಪಟ್ಟವರಿಗೆ ಕಳುಹಿಸಲಾಗುತ್ತದೆ.

• ಮೊದಲನೆಯದಾಗಿ ಭೂಕಂಪನದ ವಲಯಗಳನ್ನು ಗುರುತಿಸಿ ದೀರ್ಘಕಾಲಿಕ ಸಮಯದ ಪ್ರಾಣಹಾನಿ ಮತ್ತು ಆಸ್ತಿ ಹಾನಿಯನ್ನು ತಡೆಯುವ ಸಲುವಾಗಿ, ಭೂಕಂಪನ ನಿರೋಧಕ ರಚನೆಯ ಕಟ್ಟಡಗಳು ಮತ್ತು ಭೂ ಬಳಕೆ ವಿಧಾನಗಳನ್ನು ಅಂದಾಜಿಸುವುದು
• ಕರ್ನಾಟಕ ರಾಜ್ಯದಲ್ಲಾಗುವ ಕಡಿಮೆ ತೀವ್ರತೆಯ ಕಂಪನಗಳನ್ನು ನಿಜ ಸಮಯದಲ್ಲಿ ಈಗಾಗಲೇ ಅಸ್ತಿತ್ವದಲ್ಲಿರುವ ಭೂಕಂಪನ ಮಾಪನ ಜಾಲದಲ್ಲಿ ದಾಖಲಿಸುವ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿದೆ.

ಈಗಾಗಲೇ ಸ್ಥಾಪಿಸಿರುವ 14 ವಿ-ಸ್ಯಾಟ್ ಆಧಾರಿತ ಶಾಶ್ವತ ಭೂಕಂಪನ ಮಾಪನ ಕೇಂದ್ರಗಳಲ್ಲಿ, ಅಣೆಕಟ್ಟು ಸುರಕ್ಷತೆಯ ದೃಷ್ಟಿಯಿಂದ 10 ಕೇಂದ್ರಗಳನ್ನು ಆಣೆಕಟ್ಟುಗಳ ಸಮೀಪ ಸ್ಥಾಪಿಸಲಾಗಿದೆ. ಅವುಗಳಲ್ಲಿ ಆಲಮಟ್ಟಿ ಆಣೆಕಟ್ಟು (ವಿಜಯಪುರ ಜಿಲ್ಲೆ), ಹಿಡಕಲ್ ಆಣೆಕಟ್ಟು (ಬೆಳಗಾವಿ ಜಿಲ್ಲೆ), ಸುಪಾ ಆಣೆಕಟ್ಟು (ಉತ್ತರ ಕನ್ನಡ ಜಿಲ್ಲೆ), ತುಂಗಭದ್ರಾ ಆಣೆಕಟ್ಟು (ಕೊಪ್ಪಳ ಜಿಲ್ಲೆ), ಲಿಂಗನಮಕ್ಕಿ ಆಣೆಕಟ್ಟು(ಶಿವಮೊಗ್ಗ ಜಿಲ್ಲೆ), ಹೇಮಾವತಿ ಆಣೆಕಟ್ಟು(ಹಾಸನ ಜಿಲ್ಲೆ), ಹಾರಂಗಿ ಆಣೆಕಟ್ಟು (ಕೊಡಗು ಜಿಲ್ಲೆ), ಕೃಷ್ಣರಾಜಸಾಗರ ಆಣೆಕಟ್ಟು (ಮೈಸೂರು ಜಿಲ್ಲೆ), ಗುಂಡಾಲ್ ಜಲಾಶಯ (ಚಾಮರಾಜನಗರ ಜಿಲ್ಲೆ) ಮತ್ತು ತಿಪ್ಪಗೊಂಡನಹಳ್ಳಿ ಆಣೆಕಟ್ಟು (ಬೆಂಗಳೂರು ಜಿಲ್ಲೆ) ಗಳಲ್ಲಿ ಸ್ಥಾಪಿಸಲಾಗಿದೆ. ವಿ ಸ್ಯಾಟ್ ಮತ್ತು 20 ಕೆ ಬಿ ಪಿ ಎಸ್ ಬ್ಯಾಂಡ್-ವಿಡ್ತ್ ಸಹಾಯದಿಂದ ಎಲ್ಲಾ ಕೇಂದ್ರಗಳು ಬೆಂಗಳೂರಿನ ಕೇಂದ್ರ ಕಚೇರಿಗೆ ನಿಜ ಸಮಯದಲ್ಲಿ ದತ್ತಾಂಶಗಳನ್ನು ರವಾನೆ ಮಾಡುತ್ತಿರುತ್ತವೆ ಮತ್ತು ಈ ದತ್ತಾಂಶಗಳನ್ನು ಪರಿಶೀಲಿಸಿ ಸ್ಥಳೀಯ, ಪ್ರಾಂತೀಯ ಮತ್ತು ಟೆಲಿ-ಸಿಸ್ಮಿಕ್ ಭೂಕಂಪನಗಳನ್ನಾಗಿ ವಿಂಗಡಣೆ ಮಾಡಲಾಗುತ್ತದೆ. ವಿಶ್ಲೇಷಿಸಿದ ಮಾಹಿತಿಯನ್ನು ದೈನಂದಿನಕ ವರದಿ ರೂಪದಲ್ಲಿ ಸಂಬಂಧಪಟ್ಟ ರಾಜ್ಯ, ಜಿಲ್ಲೆ, ತಾಲ್ಲೂಕ್ ಮತ್ತು ಗ್ರಾಮ ಪಂಚಾಯತಿ ಮಟ್ಟದ ಅಧಿಕಾರಿಗಳಿಗೆ ಮತ್ತು ಅಣೆಕಟ್ಟುಗಳ ಅಭಿಯಂತರುಗಳಿಗೆ ಎಸ್ ಎಂ ಎಸ್ ಮತ್ತು ಇ-ಮೇಲ್ ಮುಕಾಂತರ ತಾಂತ್ರಿಕ ವರದಿಗಳನ್ನು ಕಳುಹಿಸಲಾಗುತ್ತದೆ. ಸ್ಥಳೀಯ ಭೂಕಂಪನಗಳು ಸಂಭವಿಸಿದರೆ, ತಾಂತ್ರಿಕ ವರದಿ ಮತ್ತು ಕೈಗೊಳ್ಳಬೇಕಾದ ಮುಂಜಾಗ್ರತಾ ಕ್ರಮಗಳನ್ನು ಜಿಲ್ಲಾಧಿಕಾರಿಗಳು, ಆಯುಕ್ತರು, ತಹಸೀಲ್ದಾರರು, ಮುಖ್ಯ ಅಭಿಯಂತರರು ಮತ್ತು ಸಂಬಂಧಪಟ್ಟ ಎಲ್ಲಾ ಅಧಿಕಾರಿಗಳಿಗೆ ಕಳುಹಿಸಿಕೊಡಲಾಗುತ್ತದೆ.